Andheron ka sheher
"Andheron Ka Sheher"
(Ek Haqiqi Horror Kahani Jo Aap Ka Khoon Jamaa DegI!)
Part 1: Anjaani Manzil
Karachi ka sheher… roshniyon ka sheher… magar jab raat hoti hai, toh kuch jagahen itni andheri aur khaufnaak lagti hain ke insaan ki rooh kaanp jaye. Aisi hi ek jagah thi "Bismillah Heights" – ek purani aur wiraan apartment building jo logon ki nazar mein ek aam jagah thi, magar jo log yahan rehte thay, unka kehna tha ke yeh makan zinda nahi… lekin murda bhi nahi hai!
Sanam aur Sohail – ek naye shadi shuda couple – jo ek acha, sasta aur behtareen flat dhoond rahe thay. Sohail ki naukri abhi abhi lagi thi, aur Sanam ek ghar-sanjh sambhalne wali larki thi. Dono ne socha ke naya ghar lena chahiye aur ek naye safar ka aaghaz karna chahiye.
Ek din Sohail ko ek property dealer ne bataya ke Bismillah Heights mein ek 3-bedroom ka flat bohot saste mein mil raha hai. Flat dekhne ke liye jab dono ponhche, toh wo jagah waqai khoobsurat aur saaf sutri lagi. Koi masla nahi tha… magar aik ajeeb baat thi—building mein koi aur rehta hi nahi tha!
Sanam ne Sohail se kaha:
"Mujhe ajeeb lag raha hai, yahan koi rehta kyu nahi?"
Sohail muskuraya:
"Arey Sanam, Karachi mein aisay saste flats kahan miltay hain? Yeh sirf ek afwah hogi, log bewakoof banate hain. Hum yahan shifte ho jatay hain!"
Sanam ne dukh bhari nazar se Sohail ki taraf dekha, magar usne aur behas nahi ki. Aur phir, dono usi raat naye ghar mein shift ho gaye…
Magar Yeh Pehli Ghalti Thi…
Raat ke do baj rahe thay. Karachi ke roads sunasaan ho gaye thay. Sanam ne pani peene ke liye kitchen ka rukh kiya. Jaise hi usne fridge ka darwaza khola, ek thandi hawa ka jhonka mehsoos hua… jaise koi saamne khara ho.
Usne dheere se peeche dekha—koi nahi tha. Wo muskura di,
"Mujhe hi ghalat fehmi ho rahi hai."
Lekin jaise hi usne fridge ka door band kiya… ek aur awaz aayi… “Sanam…”
Wo tezi se mud gayi. Lekin kitchen bilkul khali tha.
Uska dil zor zor se dhadakne laga. Wo bhaagti hui Sohail ke paas gayi, lekin Sohail gehri neend mein tha. Sanam ne use uthana chaaha, magar jaise hi usne apni gardan mod kar saamne dekha—
Ek siyah saya darwaze ke pass khada tha…!
Sanam ki cheekh nikal gayi… magar uski awaz uske gale mein atak gayi…
( To Be Continued… )
No comments:
Post a Comment